जळगाव : प्रतिनिधी
काव्यरत्नावली चौकाकडून आदर्शनगराकडे जात असलेल्या माय- लेकाच्या दुचाकीला समोरून येणाऱ्या भरधाव दुचाकीने धडक दिली. या अपघातात माय-लेक जखमी झाले असून ही घटना शुक्रवार, दि. १४ एप्रिल रोजी सायंकाळी ७ वाजेच्या सुमारास आरटीओ कार्यालयाजवळ घडली.
आदर्श नगरमध्ये वनिता सुरेश अग्रवाल या कुटुंबासह वास्तव्यास आहेत. शुक्रवार, दि. १४ एप्रिल रोजी सायंकाळी ७ वाजेच्या सुमारास त्या मुलगा रौनक याच्यासोबत काव्यरत्नावली चौकाकडून घरी जात होत्या. आरटीओ कार्यालयाजवळ विरुद्ध दिशेने आलेल्या दुचाकीस्वाराने अग्रवाल यांच्या दुचाकीला समोरून धडक देऊन पसार झाला. अग्रवाल व त्यांचा मुलगा दुचाकीवरून पडून जखमी झाले. त्यानंतर त्यांना उपचारार्थ रूग्णालयात दाखल करण्यात आले आहे. या प्रकरणी रामानंद पोलिसात गुन्हा दाखल करण्यात आला आहे.
