जामनेर : प्रतिनिधी
तालुक्यातील एका गावात २३ वर्षीय तरुणाकडून अल्पवयीन युवतीला प्रेमसंबंध तोडले तर फोटो व्हायरल करेन, अशी धमकी देत होता. अखेर युवतीने बदनामीच्या भीतीपोटी दि. २९ मार्च रोजी टोकाचे पाऊल उचलून आत्महत्या केली. याप्रकरणी पहूर पोलिसात अकस्मात मृत्यूची नोंद करण्यात आली होती. शुक्रवारी संध्याकाळी संबंधित युवकाविरुद्ध गुन्हा दाखल करण्यात आला.
मिळालेली माहिती अशी कि, पोलिस स्टेशन हद्दीतील एका गावात १७ वर्षीय अल्पवयीन युवती व २३ वर्षीय तरुण यांच्यात प्रेमसंबंध जुळले. एकेदिवशी दोन्हींचे मोबाईलवरील संभाषण युवतीच्या नातेवाइकांच्या निदर्शनास आले. युवतीला बदनामीची भीती निर्माण झाली. नातेवाइकांनी युवतीला विश्वासात घेऊन प्रकार काय आहे? अशी विचारणा केली. यानंतर दोन्हींमधील प्रेमप्रकरण संपुष्टात आले. मात्र तरुण हा युवतीला प्रेमसंबंध ठेवण्यासाठी वारंवार धमकी देत होता. प्रेमसंबंध तोडले तर माझ्यासोबत असलेले तुझे फोटो सोशल माध्यमावर व्हायरल करेन, असे बोलून धमकावत होता. तरुणाचा वारंवार त्रास व परिवाराची होणारी बदनामी या भीतीपोटी युवतीने गेल्या महिन्यात दि. २९ मार्च रोजी गळफास लावून जीवन संपवले, असे मयत युवतीच्या नातेवाइकांनी दिलेल्या फिर्यादीत म्हटले आहे.शुक्रवारी संध्याकाळी याप्रकरणात संबंधित युवकाविरुद्ध गुन्हा दाखल करण्यात आला आहे. तपास पोलिस उपनिरीक्षक संजय बनसोड करीत आहेत.
