जळगाव : प्रतिनिधी
शहरातील एका परिसरातील २२ वर्षीय मुलाने आपल्या वडिलांना सिगारेटसाठी पैसे मागितले असता वडिलांनी त्यास पैसे देण्यास नकार दिला म्हणून मुलाने वडीलांशी हुज्जत घालून समजविण्यासाठी आलेल्या आईवर चाकूने वार केल्याची धक्कादायक घटना मंगळवारी सकाळी ८.३० वाजेच्या सुमारास पिंप्राळा-हुडको येथे घडली. याप्रकरणी आईच्या फिर्यादीवरून मुलगा देवेंद्र गजानन साळूंखे (२२) याच्याविरूध्द रामानंदनगर पोलिस ठाण्यात गुन्हा दाखल झाला आहे.
मिळालेली माहिती अशी कि, शहरातील पिंप्राळा-हुडको परिसरातील प्रमिला साळूंखे हे आपल्या पती गजानन, मोठा मुलगा देवेंद्र व लहान मुलगा कार्तिक यांच्यासह वास्तव्यास आहेत. मंगळवारी सकाळी ८.३० वाजेच्या सुमारास देवेंद्र याने वडीलांकडे सिगारेटसाठी पैसे मागितले. त्यांनी पैसे देण्यास नकार दिला म्हणून त्याने वडीलांशी हुज्जत घालून शिवीगाळ केली. नंतर त्याच्या आईने त्याला समजविण्याचा प्रयत्न केला. मात्र, तिला देखील त्याने शिवीगाळ करून तुम्ही मला त्रास देतात, तुम्हाला पाहून घेईल अशी धमकी देवून खिशात लपविलेला छोटा चाकू काढून त्याने आईवर वार केला. यात त्या जखमी होवून खाली कोसळल्या. या घटनेनंतर देवेंद्र हा तेथून पळून गेला. प्रमिला यांना तत्काळ जिल्हा रूग्णालयात उपचारार्थ दाखल करून त्यांच्यावर उपचार करण्यात आले. उपचार घेतल्यानंतर दुपारी त्यांनी रामानंदनगर पोलिस ठाण्यात येवून तक्रार दिली. त्यानुसार मुलाविरूध्द गुन्हा दाखल करण्यात आला आहे.
