भंडारा : वृत्तसंस्था
जिल्ह्यातून एक धक्कादायक घटना समोर आली आहे, तरुण डॉक्टरने आपल्या राहत्या घरी पंख्याला गळफास घेऊन आत्महत्या केल्याची घटना घडली आहे. कुणाल भाऊराव चव्हाण (35) रा. स्नेहनगर तकिया वॉर्ड असं या डॉक्टरचं नावं आहे. कुणाला चव्हाण हे नागपूरच्या मेयो रूग्णालयात कर्तव्यावर होते. कुणाल यांनी आत्महत्या का केली याचं कारण अद्याप समोर आलेलं नाही.
विशेष म्हणजे दुसऱ्या दिवशी कुणाल यांचं लग्न होतं. त्यामुळे शहरात हळहळ व्यक्त होत आहे. घटनेबाबत अधिक माहिती अशी की, कुणाल चव्हाण हे नागपूरच्या मेयो रुग्णालयात कार्यरत होते. आपल्या मुलाला मोठ्या कष्टानं आई-वडिलांनी डॉक्टर बनवलं, मुलगा डॉक्टर झाल्यावर त्याच्या सुखी संसारचं स्वप्न त्यांनी पाहिलं.
त्यांनी आपल्या मुलाचं लग्न देखील ठरवलं. मात्र लग्न एका दिवसावर आलं असताना कुणाल चव्हाण यांनी आत्महत्या केली. कुणाला यांनी टोकाचं पाऊल का उचललं याबाबत अद्याप कोणतीही माहिती समोर आलेली नाहीये. कुटुंबावर शोककळा कुणाल यांचं लग्न एका दिवसावर आलं होतं. घरात सर्वत्र लग्नाचा आनंद होता. उत्साही वातावरण होतं. दुसऱ्या दिवशी मुलाचं लग्न असल्यानं आई-वडिलही खुशीत होते. सर्व सुरळीत सुरू असताना त्यांनी अचानक टोकाचं पाऊल उचल्यानं कुटुंबाला मोठा धक्का बसला आहे.
