मुंबई : वृत्तसंस्था
राज्यातील संभाजीनगर येथील महाविकास आघाडीच्या जाहीर सभेला अवघे काही तास उरले आहेत. या सभेची संपूर्ण तयारी पूर्ण झाली आहे. तर दुसरीकडे मुख्यमंत्री एकनाथ शिंदे यांनी राष्ट्रवादीला धक्का दिला आहे.
धाराशिव जिल्ह्यात आरोग्यमंत्री डॉ तानाजी सावंत यांनी राष्ट्रवादी काँग्रेसला मोठा धक्का दिला आहे. महाविकास आघाडीच्या सभेपूर्वी अनेक पदाधिकारी राष्ट्रवादी सोडणार आहे. हे सर्व जण शिवसेना पक्षात मुख्यमंत्री एकनाथ शिंदे यांच्या उपस्थितीत प्रवेश करणार आहेत. धाराशिव जिल्ह्यात कळंब तालुक्यात राष्ट्रवादी काँग्रेस पक्षाला मोठा धक्का बसला आहे. 3 माजी नगराध्यक्ष, 6 माजी उपनगराध्यक्ष, 2 माजी नगरसेवक यांच्यासह जवळपास 25-30 पदाधिकारी शिवसेनेत जात आहे. मुख्यमंत्री एकनाथ शिंदे यांच्या उपस्थितीत हे सर्व शिवसेनेत जाणार आहे. ठाणे येथे हा प्रवेश सोहळा होणार आहे.
महाविकास आघाडीची ही पहिलीच संयुक्त सभा होत आहे. त्यामुळे संपूर्ण मराठवाड्यातील वातावरणात सभेचा फिवर तयार केला गेला आहे. संपूर्ण संभाजीनगरात तिन्ही पक्षाचे झेंडे लावण्यात आले आहेत. तसेच चौकाचौकात पोस्टर, बॅनर्स आणि होर्डिंग्ज लावण्यात आले आहेत. या शिवाय सभेची दवंडी दिली जात आहे. लोकांना सभेला येण्याचं आवतन दिलं जात आहे. सभेच्या माध्यमातून शिंदे सरकारचा पर्दाफाश होणार असल्याचं दवंडी देणारा सांगत आहे. परंतु त्यापूर्वीच मुख्यमंत्री एकनाथ शिंदे यांनी राष्ट्रवादीला धक्का दिला आहे.
