चोपडा : प्रतिनिधी
कुरिअर ऑनलाइन ट्रॅक करताना अज्ञाताने पाठविलेल्या लिंकवरून दोन रूपये पाठविण्यास सांगितल्यावर चोपडा शहरातील रामकुवर नगरातील रहिवासी असलेले खंडेराव पाटील यांनी दोन रूपये पाठविले. काही वेळाने खात्यातून ९८ हजार ६९८ रुपये परस्पर काढून त्यांची फसवणूक करण्यात आली.
खंडेराव पाटील यांनी आपल्या मुलीसाठी शहरातील तिरुपती कुरिअर येथून मोबाइल पाठविला होता. मुलीला पाठवलेला मोबाइल पार्सल ऑनलाइन ट्रॅक करीत असताना त्यांना एक मोबाइल क्रमांक मिळाला. त्यावर त्यांनी संपर्क केला असता व्यक्तीने लिंक पाठवून पाटील यांना दोन रूपये पाठविण्यासा सांगितले. त्यांनी दोन रूपये पाठवताच काही वेळाने त्यांच्या खात्यावरून ९८ हजार ६९८ रुपये परस्पर वर्ग होऊन फसवणूक केल्याची घटना दि. ११ रोजी संध्याकाळी घडली आहे.
