जळगाव : प्रतिनिधी
जळगाव शहरात गेल्या काही महिन्यापासून चारचाकीसह दुचाकी सुसाट चोरल्या जात आहे. अनेक सार्वजनिक ठिकाणाहून दुचाकीसह चारचाकी चोरीस जात असले तरी पोलीस प्रशासनाकडून कुठलेही कठोर पावले उचलले जात नाही. शहरातील एका परिसरातून चारचाकी चोरीस गेली होती. या प्रकारणी एमआयडीसी पोलिसांनी नुकतेच धारावी येथील एका चोरट्यास अटक केली आहे.
शहरातील अयोध्या नगरातील बबनराव थोरवे यांची कार लांबविणाऱ्या अब्दुल रहेमान शहाबुद्दीन शेख (३७, रा.धारावी झोपडपट्टी, मुंबई) या चोरट्याला एमआयडीसी पोलिसांनी नागपूर येथून बेड्या ठोकल्या आहेत. पोलिसांनी त्याच्याकडून चोरीला गेलेली कार हस्तगत केली असून त्याची न्यायालयीन कोठडीत रवानगी करण्यात आली आहे.बबनराव थोरवे यांनी २१ फेब्रुवारी रोजी रात्री ११ वाजता घरासमोर त्यांच्या मालकीची एमएच. १९. सीयू ०३५८ क्रमांकाची कार उभी केली होती. २२ फेब्रुवारी रोजी पहाटे ५ वाजता थोरवे हे मॉर्निंग वॉकसाठी घराबाहेर आल्यावर त्यांना कार दिसून आली नव्हती. त्यानंतर त्यांच्या फिर्यादीवरून एमआयडीसी पोलिसात कार चोरीचा गुन्हा दाखल झाला होता. या गुन्ह्याचा तपास इमरान सैय्यद हे करीत होते. या गुन्ह्याची माहिती एमआयडीसी पोलिसांनी राज्यातील इतर पोलिसांनाही दिली होती.
अब्दुल रहेमान शहाबुद्दीन शेख याच्याविरुध्द नागपूर येथे दोन दरोड्याचे गुन्हे दाखल आहेत. त्याशिवाय त्यांची गँगसुध्दा असून त्यांच्या मदतीने तो कार चोरी करायचा. ही गँग कार चोरण्यात माहिर असल्याची माहिती पोलिसांनी दिली. दरम्यान, शेख याच्याकडून आणखी चोरीचे गुन्हे उघडकीस येण्याची शक्यता आहे.
