एरंडोल : प्रतिनिधी
शहरातील मुख्य रस्त्यावरील माऊली ज्वेलर्स दुकानातून चोरट्यांनी सुमारे अडीच लाख किंमतीचा मुद्देमाल लांबवला. या घटनेने शहरात मोठी खळबळ उडाली असून या प्रकरणी एरंडोल पोलिसात गुन्हा दाखल करण्यात आला.
मिळालेली माहिती अशी कि, शहरातील प्रसाद वाघ यांच्या मालकीचे माऊली ज्वेलर्स ११ मार्च रोजी पहाटे दोन ते सव्वातीन वाजेच्या दरम्यान सोन्या चांदीचे दागिने तयार करण्याचे दुकान अज्ञात चोरट्यांनी फोडले. या दुकानाच्या शटरला लावलेले कुलूप न उघडता शटर वाकवून अज्ञात चोरट्यांनी दुकानात प्रवेश करीत ऑर्डरसाठी आलेले 50 हजार रुपये किंमतीचे 10 ग्रॅम सोन्याचे दागिने, 45 हजार रुपये किंमतीचे सोन्याची पॉलिश केलेले दागिने, एक लाख 10 हजार किंमतीच्या सोन्याची पॉलिश केलेल्या फुल्या, 50 हजार रुपये किंमतीचे चांदीचे भांडे, कडे व मोड असा एकूण दोन लाख 55 हजार रुपये किमतीचा मुद्देमाल लंपास केला.
न दुकानासमोरील लावलेल्या सीसीटीव्ही कॅमेर्यात व गावातील सी.सी. टी.व्ही.कॅमेर्यात तोंडाला रुमाल बांधलेले चार चोरटे दिसत असल्याचे तसेच चोरटे इको कंपनीच्या चारचाकी गाडीत दुकानासमोर आल्याचे स्पष्ट झाले आहे. दुकानदार प्रसाद वाघ हे गेल्या तीन दिवसांपासून ते नातेवाईकांच्या लग्नाला नाशिकला गेल्यानंतर दुकान बंद असल्याची संधी चोरट्यांनी साधली तर शनिवारी सकाळी सहा वाजता दुकाना शेजारी राहणारे सायकल मार्टचे मालक भगवान चौधरी यांनी फोन करून चोरीची माहिती दिली. दरम्यान, श्वान पथकाने बुधवार दरवाजापर्यंत माग दाखवला. पुढील तपास एरंडोल पोलीस निरीक्षक सतीश गोराडे यांच्या मार्गदर्शनाखाली पोलिस उपनिरीक्षक शरद बागल, अनिल पाटील, मिलिंद कुमावत, पंकज पाटील करत आहे.
