मसाजच्या नावाखाली सुरु होता असा उद्योग !

नाशिक : वृत्तसंस्था 

नाशिकच्या उच्चभ्रू ठिकाणी मसाज पार्लरच्या नावाखाली सुरू असलेल्या वेश्या व्यवसायाचा अड्डा मध्यवर्ती गुन्हे शाखेच्या पोलिसांनी उध्वस्त केला. याबाबत पोलिसांनी दिलेली अधिक माहिती अशी की, शरणपूर रोड वरील सुयोजित मॉडर्न पॉईंट या इमारतीत अनेश अरुण उन्हवणे याने 2 गाळे भाड्याने घेऊन तेथे योग वेलनेस स्पा या नावाने मसाज पार्लर सुरू केले होते. या ठिकाणी वेश्या व्यवसाय सुरू असल्याची गोपनीय माहिती पोलीस उपनिरीक्षक सुनील माळी यांना मिळाली होती.

या माहिती वरून मध्यवर्ती गुन्हे शाखेच्या पथकाने सदर ठिकाणी छापा टाकला. तेथे एक महिला व ललित पांडुरंग राठोड हे दोघे महिलांना पैशांचे प्रलोभन देऊन अनैतिक देह व्यापाराचा व्यवसाय करताना मिळून आले. तेथे 6 पीडित महिलांची सुटका करण्यात आली. आरोपी महिला व ललित राठोड दोघांना हा व्यवसाय करताना गाळा मालक अनेश उन्हवणे तसेच गाळा भाड्याने उपलब्ध करून देणारे सागर ओमकार अग्रवाल व पियुष ओमकार अग्रवाल या सर्वांविरुद्ध सरकारवाडा पोलीस ठाण्यात गुन्हा नोंदविण्यात आला.