रावेर : प्रतिनिधी
तालुक्यातील सावदा येथे रविवार पेठ आठवडे बाजारात खंडेराववाडीजवळ दि. ४ रोजी संध्याकाळी ७ वाजेच्या सुमारास ‘ट्रॅक्टर व दोन दुचाकी यांच्यात अपघात झाला. या घटनेत गंभीर जखमी झालेल्या १३ वर्षीय लहान मुलाचा उपचारादरम्यान मृत्यू झाला. अपघातात तीन जखमी झाले आहेत. त्यांना पुढील उपचारार्थ जळगाव येथे हलविण्यात आले आहे.
आठवडे बाजारात अज्ञात ट्रॅक्टर चालक भरधाव वेगात होता. त्याचवेळी १३ वर्षीय बालक नूर मोहम्मद हा ओम कॉलनीतून जेवणाचा डबा घेऊन जात होता. तो एक दुचाकी ट्रिपल सीट व अन्य दुचाकी चालक नूर मोहम्मद याच्या मागे चालत असताना अज्ञात ट्रॅक्टरने त्याला धडक दिली. याच ट्रॅक्टरने ट्रिपलसीट जाणाऱ्या दुचाकीलाही धडक दिली. या घटनेत बालक नूर मोहम्मद यास डोक्याच्या मागील बाजूस जबरदस्त दुखापत झाली होती. त्यास प्राथमिक उपचारासाठी फैजपूर येथील खासगी रुग्णालयात दाखल करण्यात आले. त्यावेळी उपचारादरम्यान त्याचा रात्री मृत्यू झाला. दुचाकीवरील चालक गजानन भागवत सपकाळे व दोन मित्र या अपघातात जखमी झाले आहेत.
