जळगाव : प्रतिनिधी
शहरातील उस्मानियों पार्क येथील विवाहितेने घरात गळफास घेऊन जीवनयात्रा संपविल्याचा धक्कादायक घटना बुधवारी सकाळी ७ वाजता समोर आली आहे. याप्रकरणी शहर पोलिस ठाण्यात अकस्मात मृत्यूची नोंद करण्यात आली आहे. सना तौसिफ मिस्तरी (वय २१, रा. उस्मानियाँ पार्क, शिवाजीनगर) असे मृत विवाहितेचे नाव आहे.
विवाहितेच्या नातेवाइकांनी दिलेल्या माहितीनुसार, सना तौसिफ मिस्तरी ही विवाहिता पती, सासू आणि सासरे यांच्यासह वास्तव्याला होती. गेल्या दोन महिन्यांपासून घरात कौटुंबिक वाद सुरू होता. घरात होत असलेल्या कौटुंबिक वादासंदर्भात विवाहितेने तिचे वडील मजीद शेख सांडू यांना सांगितले होते. गेल्या चार दिवसांपूर्वीच सनाचे आपल्या आई- वडिलांशी शेवटचे बोलणे झाले होते. मंगळवारी मध्यरात्री सर्व जण झोपलेले असताना विवाहितेने राहत्या घरात गळफास घेऊन आत्महत्या केली. ही घटना बुधवारी सकाळी ७ वाजता उघडकीला आली. दरम्यान, पतीसह सासरच्या मंडळींच्या त्रासातून मुलीने आत्महत्या केली, असा आरोप विवाहितेचे वडील मजीद शेख सांडू व आई शबाना मजीद शेख सांडू यांनी पत्रकारांशी बोलताना केला आहे. सासरच्या मंडळीविरोधात गुन्हा दाखल करावा, अशी मागणी मुलीकडील नातेवाइकांनी केले आहे. शासकीय वैद्यकीय महाविद्यालयात माहेरकडील नातेवाइकांनी मोठी गर्दी केली होती. या घटनेबाबत शहर पोलिस ठाण्यात अकस्मात मृत्यूची नोंद करण्यात आली आहे. तपास पोहेकॉ रवींद्र सोनार करीत आहेत.
