यावल : प्रतिनिधी
तालुक्यातील सावदा येथे दोन गटात वाद होत असताना तो सोडविणाऱ्या पोलिस उपनिरीक्षक विनोद खांडबहाले यांनाच मारहाण झाल्याचा प्रकार २२ फेब्रुवारी रोजी सावदा विश्रामगृहासमोर घडला. या प्रकरणी गुन्हा दाखल करण्यात आला आहे.
बुधवारी संध्याकाळी दोन गटात भांडणे होत असल्याची माहिती मिळाली असता सावदा पोलिस पथक घटनेची शहानिशा करण्यास गेले. त्यावेळी दोन गटात वाद सुरू असताना उपनिरीक्षक खांडबहाले यांनी तो सोडविण्याचा प्रयत्न केला असता वाद घालणाऱ्यांनी पोलिसांना वादात पडू नका असे सांगून खांडबहाले यांनाच मारहाण केली.
याप्रकरणी पो.ना. मोहसीन खान यांनी सावदा पोलिस ठाण्यात दिलेल्या तक्रारीवरू गुन्हा दाखल करण्यात आला आहे. याप्रकरणी दोघांना अटक केली. त्यांना रावेर न्यायालयात शुक्रवारी हजर केले असता २ दिवसाची पोलिस कोठडी सुनावली. दोन गटात झालेल्या हाणामारीची घटनामुळे शहरातील शांतता अबाधित ठेवण्यासाठी सावदा, फैजपूर, निंभोरा येथील पोलिसांसह उपविभागीय अधिकारी पोलीस अधिकारी कुणाल सोनवणे फैजपूर व उपविभागीय पोलीस अधिकारी प्रताप शिकारे मुक्ताईनगर यांच्या मार्गदर्शनाखाली चोख बंदोबस्त ठेवण्यात आला होता.
