पहूर : प्रतिनिधी
कॉलेज वयातच पोलिस होऊन वडिलांना हातभार लावण्याचे स्वप्न उराशी बाळगणाऱ्या तरुणाचा मंगळवारी दुर्दैवी मृत्यू झाला. रोशन भैरू पवार (वय २०, रा. पहूर) असे मृताचे नाव आहे. त्याच्यावर जामनेर येथील खासगी रुग्णालयात उपचार सुरू होते. सोमवारी त्याने पुणे येथे पोलिस भरतीसाठी मैदानी चाचणी दिली होती.
पहूर येथील भैरू बळीराम पवार हे पत्नीसह मजुरी करतात. त्यांचा मुलगा रोशन जामनेर येथील धारीवाल महाविद्यालयात बी.ए. द्वितीय वर्षात शिक्षण घेत होता. त्यासोबत तो पोलिस भरतीची तयारी करत होता. पुणे येथे पोलिस भरती सुरू असल्याने रविवारी रात्री रोशन पुण्याला गेला होता. सोमवारी त्याने मैदानी चाचणी दिली. रोशन भैरू पवार (वय २०, रा. पहूर) असे मयत तरुणाचे नाव आहे.
यानंतर दुपारी त्याला डी हायड्रेशनचा त्रास झाला. स्थानिक पोलिसांनी त्याच्यावर प्राथमिक उपचार करून भुसावळला जाणाऱ्या रेल्वेत बसवून दिले. ही माहिती रोशनने वडिलांना फोनवरून दिली होती. यामुळे मंगळवारी पहाटे पाचच्या सुमारास रोशनचे मित्र व नातेवाईक भुसावळला गेले होते. त्याला भुसावळात खासगी रुग्णालयात दाखल केले होते. प्रकृतीत सुधारणा होत नसल्याने रोशनला जामनेर येथील रुबी रुग्णालयात दाखल केले; परंतु शरीरातील पाणी खूप कमी झाल्याने अखेर मंगळवारी दुपारी दोनच्या सुमारास त्याचा दुर्दैवी मृत्यू झाला. बुधवारी सकाळी त्याच्यावर अंत्यसंस्कार करण्यात येणार आहेत. रोशनच्या पश्चात आई, वडील, दोन भाऊ, आजी, आजोबा असा परिवार आहे.
