अमळनेर : प्रतिनिधी
शिरपूरहून जामनेरला गुरे वाहून नेणाऱ्या मिनी ट्रकचा पाठलाग केला. करून पकडण्यात आले. चालकाला मारहाण करून वाहन जाळून टाकण्यात आले. या प्रकरणी सात जणांविरुद्ध गुन्हा दाखल करण्यात आला आहे. ही घटना सोमवार १३ रोजी पहाटे धरणगाव रस्त्यावर सतीमाता मंदिराजवळ घडली.
संदीप रमेश शिरसाठ (रा. सुंदरगढी, चोपडा) हा १२ रोजी मालवाहू चारचाकी घेऊन शिरपूर येथील गुरांच्या बाजारात गेला होता. तेथील व्यापारी विजय शिवाजी पाटील यांच्याकडील १० गोहे घेऊन त्याला जामनेर तालुक्यातील नेरी येथे जायचे होते. यासाठी हातेड जळोद मार्गे तो येत होता. हातेड गावाजवळ वाहनात गुरे असल्याचे पाहून काही जणांनी दोन चारचाकी वाहनातून पाठलाग सुरु केला. शेवटी धरणगावनजीक सतीमाता मंदिराजवळ दोन्ही वाहनांनी गुरांनी भरलेले वाहन अडवले.
दोन्ही वाहनात असलेल्या सात जणांनी चालकाला मारहाण केली. या सातही जणांनी दहा गुरे उतरवून सोडून दिली आणि वाहन जाळून टाकले. संदीप हा कसाबसा चोपडा येथे पोहोचला व उपचार केले. दवाखान्यातून आल्यावर अमळनेर पोलिस स्टेशनला फिर्याद दिली. त्यावरून सात अज्ञात व्यक्तीविरुद्ध दंगल व जाळपोळ केल्याचा अमळनेर पोलिसात गुन्हा नोंदविण्यात आला आहे. तपास हेकॉ. मिलिंद बोरसे करीत आहेत.
