मुंबई : वृत्तसंस्था
केंद्रीय निवडणूक आयोगाकडून एकनाथ शिंदे यांना मोठा दिलासा मिळाला आहे. शिवसेना या नावासह धनुष्यबाण हे चिन्ह निवडणूक आयोगाने एकनाथ शिंदे यांना दिले आहे. हा उद्धव ठाकरे यांना मोठा धक्का मानला जात आहे. याच पार्श्वभूमीवर ‘बाळासाहेब घात झाला हो’, असे म्हणत ढसाढसा रडतानाचा शिवसैनिकाचा एक व्हिडिओ सध्या व्हायरल झाला आहे.
निवडणुक आयोगाने दिलेल्या निर्णयाला ठाकरे गटाकडून मोठ्या प्रमाणात विरोध केला जात आहे. ठिकठिकाणी आंदोलने, निषेध व्यक्त केला जात आहे. आयोगाच्या निकालानंतर परभणीतील शिवसैनिकाचा एक व्हिडिओ व्हायरल झाला आहे. या व्हिडिओत शिवसैनिकाला अश्रू अनावर झाले आहेत.
ज्या शिवसैनिकाचा हा व्हिडिओ आहे. त्याचे नाव विजय खिस्ते पाटील आहे. यापूर्वीही त्यांनी उद्धव ठाकरे यांना समर्थन देण्यासाठी आपल्या रक्ताने पत्र लिहिले होते. विजय खिस्ते या व्हिडिओत म्हणत आहे, ‘बाळासाहेब घात झाला हो, घात. शिवसेनेचा धनुष्यबाण जो परभणी जिल्ह्याने शिवसेनाला दिला होतो तो धनुष्यबाण गद्दारांनी गद्दारी करुन घेतला आहे. गद्दारांनी सामान्य शिवसैनिकांच्या काळजात घाव घातला. तुम्ही म्हणतात, रडायचे नाही, लढायचे, कसे लढायचे देवावरचा विश्वास उडून गेला’
