बुलढाणा : वृत्तसंस्था
बोहल्यावर चढण्याआधीच तरुणाने होणाऱ्या बायकोचा खून केल्याची धक्कादायक घटना मंठा तालुक्यातील बेलोरा तांडा येथे शनिवारी दुपारी एक वाजेच्या सुमारास घडली. सपना संदीप जाधव असे मयत मुलीचे नाव आहे. खून करून संशयित सुशील पवार हा फरार झाला असून, १५ दिवसांपूर्वीच त्यांचा साखरपुडा झाल्याची माहिती पोलिसांनी दिली. संशयित मुलाच्या वडिलासह भावाला ग्रामस्थांनी गावातील एका खोलीत कोंडल्याने गावात तणावाचे वातावरण निर्माण झाले होते.
बेलोरा तांडा येथील कल्पना संदीप जाधव हिचा विवाह बुलढाणा जिल्ह्यातील मेहकर तालुक्यातील वरूड येथील सुशील पवार या तरुणासोबत १७ मार्च रोजी ठरला होता. १५ दिवसांपूर्वीच त्यांचा साखरपुडाही झाला होता. मुलाचा बस्ता खरेदी करण्यासाठी शनिवारी मुलाकडील व मुलीकडील मंडळी लोणार येथे गेले होते. मुलगाही बस्ता खरेदी करण्यासाठी गेला होता. परंतु, तो तेथून थेट बेलोरा तांडा येथे गेला. मुलगी कल्पना ही घरी एकटीच होती. तेथे त्यांची वादावादी झाली. त्यातूनच त्याने चाकूने गळा चिरून खून केला. घरात असलेल्या लहान मुलांनी ही बाब ग्रामस्थांना सांगितली. याची माहिती सेवली पोलिसांना देण्यात आली. पोलिसांनी घटनास्थळी धाव घेऊन पंचनामा केला. या प्रकरणी सेवली पोलिस ठाण्यात गुन्हा दाखल करण्याची प्रक्रिया सुरू होती. यावेळी नातेवाइकांनी मुलीचा मृतदेह थेट सेवली पोलिस ठाण्यात आणला होता. जोपर्यंत आरोपीला अटक करत नाही, तोपर्यंत मृतदेह उचलणार नसल्याचा इशारा दिला. पोलिसांनी समजूत काढल्यानंतर मृतदेह घरी घेऊन गेले.
