जळगाव : प्रतिनिधी
बांभोरी पुलाजवळील जकात नाक्यासमोरील महामार्गावर दोन दुचाकींची समोरासमोर धडक झाली. या अपघातात रस्त्यावर फेकल्या गेलेल्या एका दुचाकीस्वाराला चारचाकी वाहनाने चिरडल्याची घटना मंगळवारी सायंकाळी ७.३० वाजेच्या सुमारास घडली. दीपक सुरेश नन्नवरे (२०, रा. बांभोरी ता. धरणगाव) असे मृत तरुणाचे नाव आहे. दरम्यान, या अपघात दोन जण जखमी झाले आहे. त्यांच्यावर जिल्हा रुग्णालयात उपचार सुरू आहे.
दीपक नन्नवरे हा आईवडील आणि भावांसोबत बांभोरी येथे वास्तव्याला होता. मजुरी काम करून तो कुटूंबाचा उदरनिर्वाह करायचा. मंगळवारी सायंकाळी जळगावातील काम आटोपून दीपक हा मित्र ललित गोकूळ पाटील (रा. बांभोरी) याच्यासोबत बांभोरी येथे दुचाकीने येत होता. सायंकाळी ७.३० वाजेच्या सुमारास बांभोरी पुलाजवळील जकात नाक्यासमोरून जात असतांना समोरून येणाऱ्या दुचाकीने त्यांच्या दुचाकीला धडक दिली.या धडकेत दीपक महामार्गाच्या मध्यभागी पडला. त्याचवेळी बांभोरीगावाकडून जळगावकडे जाणाऱ्या अज्ञात वाहनाने त्याला चिरडले. यात त्याचा जागीच मृत्यू झाला तर सोबत असलेला ललित पाटील हा गंभीर जखमी झाला. अपघात घडल्यानंतर बांभोरी गावातील ग्रामस्थांनी व मित्र परिवारांनी घटनास्थळी धाव घेवून दोघांना तातडीने जिल्हा रुग्णालयात याप्रकरणी जळगाव तालुका पोलीस ठाण्यात अकस्मात मृत्यूची नोंद करण्यात आली आहे. रात्री जिल्हा रुग्णालयात नातेवाईकांची मोठी गर्दी झाली होती. तर धडक देणा-या दुचाकीवरील एक जण जखमी झाला आहे. मयताच्या पश्चात आई-वडील आणि भाउ असा परिवार आहे.
