धरणगाव : प्रतिनिधी
शहरातील एरंडोल रस्त्यावरील किकाभाई बोहरी यांच्या बंगल्यासमोर ७३ वर्षीय वृद्धाच्या हातातील सोन्याची अंगठी दोन अनोळखी इसमांनी घेवून फरार झाल्या प्रकरणी धरणगाव पोलिसात गुन्हा दाखल करण्यात आला आहे.
मिळालेली माहिती अशी कि, शहरातील कमल नगरातील रहिवासी असलेले सेवानिवृत्त छगन सखाराम खैरणार (वय ७३) हे दि १७ रोजी सकाळी ११ वाजेच्या सुमारास घरी येत असतांना एरंडोल रस्त्यावरील किकाभाई बोहरी यांच्या बंगल्यासमोर दोन युवकांनी दुचाकीवर येत यांना पोलीस असल्याची बतावणी करीत त्यांच्या दुचाकीसह त्यांची तपासणी करीत असतांना वृद्ध इसमाला त्यांची अंगठी काढण्यास सांगत त्यांच्या हातातून अंगठी शिताफीने चोरट्यांनी लंपास केली आहे. हि अंगठी ३० हजार रुपये किमतीची आहे. या प्रकरणी सायबर पोलिसात दिलेल्या फिर्यादीवरून दोन संशयित आरोपी विरोधात गुन्हा दाखल करण्यात आला आहे. पुढील तपास पो.हेकॉ.रामदास पावरा हे करीत आहेत.
