अमळनेर प्रतिनिधी । अवैधपणे गुरांची वाहतूक करणारे पिकअप वाहन पोलीसांनी पकडले असून तीन गायींची सुटका करण्यात आली आहे. याप्रकरणी अमळनेर पोलीस ठाण्यात दोन जणांवर गुन्हा दाखल करण्यात आला. ही कारवाई पोलीसांनी सावखेडा शिवारातील कुसुमाई पेट्रोलपंपाजवळ केली आहे.
याबाबत अधिक असे की, सावखेडा शिवारातील कुसुमाई पेट्रोलपंपाजवळून गुरांची अवैधपणे वाहतूक होत असल्याची गोपनिय माहिती अमळनेर पोलीस ठाण्याचे पोलीस निरीक्षक विकास देवरे यांना मिळाली. त्यानुसार त्यांनी पथकाला कारवाईच्या सुचना दिल्या. पथकाने मंगळवारी २८ मे रोजी पहाटे ४ वाजता कारवाई करत पिकअप वाहन क्रमांक (एमएच २० ईएल ४३२८) पकडले. वाहनाची तपासणी केली असता तीन गायींना निर्दयीपणे बांधल्याचे दिसून आले. याप्रकरणी पोलीसांनी वाहन जप्त केले असून गायींची सुटका करण्यात आले. याप्रकरणी पोलीस कॉन्स्टेबल योगेश बागुल यांनी दिलेल्या फिर्यादीवरून गोपाल गोविंद मंडावत वय-३० आणि साईनाथ मगन कानडजे वय-३२ दोन्ही रा. छत्रपती संभाजी नगर यांच्या विरोधात गुन्हा दाखल करण्यात आला.
