आजकाल अपघाताचे प्रमाण वाढले असून अपघातात मृत होणाऱ्यांचे प्रमाणही वाढले आहे. अशातच गोरखपूर मधून एका अपघाताची बातमी समोर आली आहे. वेगाने येणाऱ्या ट्रकने रस्त्याच्या कडेला उभ्या असलेल्या बसला धडक दिली. हि धडक इतकी भीषण होती कि या धडकेत बसमधील सहा प्रवाशांचा मृत्यू झाला असून २६ प्रवासी गंभीर जखमी झाल्याची घटना घडली.
याबाबत अधिक माहिती अशी कि, गोरखपूरमधून हि बस प्रवाशांना घेऊन कुशीनगरमधील पडरौना येथे जात असताना जगदीशपूरमधील मल्लपूरजवळ बसचे चाक पंक्चर झाले होते. ड्रायव्हर आणि कंडक्टर बस रस्त्याच्या कडेला पार्क करून प्रवाशांना दुसऱ्या बसमध्ये बसवत होते. काही प्रवासी बसमध्ये चढले होते तर काही दोन बसच्या मध्ये उभे होते.
यावेळी, वेगात येणाऱ्या ट्रकने बसला पाठीमागून धडक दिली. या भीषण अपघातात बसमधील सहा प्रवाशांचा मृत्यू झाला तर २६ प्रवासी गंभीर जखमी झाले आहेत जखमींना तात्काळ रुग्णालयात दाखल करण्यात आले असून त्यांच्यावर उपचार सुरु आहेत. हा अपघात गुरुवारी रात्री अकरा वाजेदरम्यान घडली.
